FHG - Fyrirtæki í hótel- og gistiþjónustu boða til mikilvægs fundar n.k. miðvikudag, 11.mars kl. 16:00 í 2.hæðar fundarsal Hilton Reykjavik Nordica hótelinu, Suðurlandsbraut 2, 108 Reykjavík Allir hótelrekendur velkomnir.
Úr vörn í sókn - tækifæri ferðaþjónustunnar sem við blasa í kjölfar undangenginna áskorana Gestur fundarins verður Óskar Jósefsson framkvæmdastjóri Stjórnstöðvar ferðamála, en á þeim vettvangi hefur verið lagt á ráðin undanfarna daga um mótvægisaðgerðir gegn áföllum greinarinnar undanfarið ár. Að líkindum hefur engin þjóð tekið kórónaveiruna Covid 19 jafn föstum tökum og Íslendingar: Hundruðum vísað í sóttkví - til vonar og vara - fjöldi greindra tilfella hærri en nokkurs staðar miðað við höfðatölu og hinum smituðu veitt ummönnun af sérfræðingum í öruggu umhverfi. Engin alvarleg tilfelli greind, engin dauðsföll og þorra smita má rekja til skíðaferða á afmörkuðum svæðum Evrópu. Spurningin er - erum við að ganga of langt í varúðarráðstöfunum, eða felast í þessu tækifæri til stórfelldrar markaðssetningar strax og greindum smitum hérlendis tekur að fækka. Fyrstu tveir árfjórðungar ársins 2020 munu vissulega taka á marga, en við eigum þess kost að ná vopnum okkar vel á ársfjórðungi 3 og 4 - ef rétt er á málum haldið. Á einhverjum tímapunkti þarf að dempa umræðuna í fjölmiðlunum og beina athygli okkar helstu markaðssvæða að því að Ísland er einn öruggasti staður veraldar að sækja heim: Heilbrigði í fyrirrúmi, hreinlæti til fyrirmyndar, að ekki sé minnst á hreina loftið okkar, vatnið og umhverfið allt. Landslag og menning sem ekki á sinn líka neins staðar í heiminum. Mörg hundruð milljónir ferðamanna um allan heim eru í dag ráðvilltir og tvístígandi. Stjórnvöld hafa viðurkennt að fjárfesting í þeirri grein sem mestu hefur aflað þjóðarbúinu undanfarin ár, hefur alls ekki verið í samræmi við hrein framlög greinarinnar til hins opinbera: Ferðaþjónustan aflaði hreinna 60 milljarða í fyrra og hreinna 70 milljarða í hitteðfyrra! Auk þessa ræðum við stöðu á vinnumarkaði o.fl. undir liðnum: Önnur mál. Hittumst og ígrundum viðbrögð okkar, samræmum aðgerðir og verjum orðstír íslenskrar ferðaþjónustu, jafnhliða því að leggja á ráðin með skýr skilaboð út á markaðinn, sem Íslandsstofu og tengdum aðilum verður falið að koma kröftuglega á framfæri á komandi mánuðum! Hittumst heil n.k. miðvikudag! F.h. stjórnar FHG - fyrirtækja í hótel- og gistiþjónustu Kristófer Oliversson Jakob Frímann Magnússon formaður stjórnar FHG ritari stjórnar FHG